کراچی — محکمہ اسکول ایجوکیشن سندھ نے اربعین حضرت امام حسین (رض) کے موقع پر 4 اگست 2026 (منگل) کو صوبے بھر کے تمام سرکاری اور نجی تعلیمی ادارے بند رکھنے کا اعلان کیا ہے۔ محکمہ کی جانب سے جاری کردہ نوٹیفکیشن کے مطابق یہ فیصلہ اسٹیئرنگ کمیٹی کے اجلاس میں طے پانے والے ایجنڈے کے تحت کیا گیا ہے، جس کا اطلاق سندھ بھر میں اسکول ایجوکیشن اینڈ لٹریچر ڈپارٹمنٹ کے زیرِ انتظام چلنے والے تمام اسکولوں پر ہوگا۔ حضرت امام حسین (رض) اور شہدائے کربلا کے چہلم کے موقع پر صوبے کے مختلف شہروں میں علم، تعزیہ اور ذوالجناح کے جلوس نکالے جائیں گے۔
دوسری جانب امن و امان کو برقرار رکھنے کے لیے سندھ حکومت کے محکمہ داخلہ نے اربعین کے موقع پر صوبے بھر میں موٹر سائیکل کی ڈبل سواری پر پابندی عائد کر دی ہے، جبکہ یکم اگست سے صوبے بھر میں دفعہ 144 کے نفاذ میں بھی ایک ماہ کی توسیع کر دی گئی ہے۔ اس حکم کے تحت صوبے بھر میں وال چاکنگ، ریلیاں نکالنے، مظاہروں اور اسلحے کی نمائش پر مکمل پابندی ہو گی۔
