اسرائیل کے دارالحکومت تل ابیب میں ہزاروں مظاہرین نے فوجی ہیڈکوارٹرز کے سامنے جمع ہوکر غزہ میں فوری جنگ بندی اور یرغمال بنائے گئے اسرائیلی شہریوں کی بازیابی کا مطالبہ کیا۔
بین الاقوامی میڈیا کے مطابق، مظاہرہ اسرائیلی عوام کی وزیراعظم بنجمن نیتن یاہو کی جنگی پالیسیوں سے بڑھتی ہوئی ناراضی کی عکاسی کرتا ہے۔
مظاہرین نے "جنگ بند کرو!” اور "انہیں واپس لاؤ!” جیسے نعرے لگائے اور مطالبہ کیا کہ انسانی جانوں کو سیاسی مفادات پر ترجیح دی جائے۔ ایک مظاہر نے کہا، "یہ جنگ اب صرف تباہی لا رہی ہے، فلسطینی اور اسرائیلی دونوں عوام اس کا خمیازہ بھگت رہے ہیں۔”
بین الاقوامی میڈیا کے مطابق، اس دباؤ کے پیش نظر نیتن یاہو نے اپنی کابینہ کے دائیں بازو کے اتحادی رہنماؤں ایتمار بن گویر اور بیزلیل سموٹریچ کو جنگ بندی کے ممکنہ منصوبے پر مشاورت کے لیے طلب کر لیا ہے۔
یہ مظاہرہ ایسے وقت میں ہو رہا ہے جب اندرونِ ملک عوامی بے چینی کے ساتھ ساتھ عالمی برادری کا دباؤ بھی تیزی سے بڑھ رہا ہے، اور یرغمالیوں کے اہلِ خانہ فوری اقدامات کا مطالبہ کر رہے ہیں۔
