نیویارک — امریکی صدر ڈونلڈ ٹرمپ نے اقوام متحدہ کی جنرل اسمبلی سے خطاب کے دوران ایک بار پھر لندن کے میئر صادق خان کو کڑی تنقید کا نشانہ بنایا اور دعویٰ کیا کہ لندن "شرعی قانون کی طرف جانا چاہتا ہے۔”
اپنے خطاب میں ٹرمپ نے کہا، "میں لندن کو دیکھ رہا ہوں، جہاں ایک ناکام میئر ہے، اور یہ شہر مکمل طور پر بدل چکا ہے۔ اب وہ شریعت کی طرف جانا چاہتے ہیں، لیکن کسی دوسرے ملک میں ایسا ممکن نہیں۔”
ٹرمپ کے اس بیان پر لندن کے میئر کے ترجمان نے مختصر ردعمل دیتے ہوئے کہا کہ وہ صدر کے "متعصبانہ بیانات” پر کوئی تبصرہ نہیں کریں گے۔ ان کے مطابق لندن دنیا کے بہترین اور محفوظ ترین شہروں میں شامل ہے اور یہ امریکی شہریوں کے لیے بھی پرکشش ہے۔
یاد رہے کہ صادق خان ماضی میں ٹرمپ کی اس تجویز کے سخت ناقد رہے ہیں جس میں مسلمانوں کے امریکہ آنے پر پابندی لگانے کی بات کی گئی تھی۔ اس کے بعد سے دونوں رہنماؤں کے درمیان تلخ بیانات کا سلسلہ جاری ہے۔
