طوفان کالماگی نے فلپائن اور ویتنام میں تباہی مچادی، درجنوں ہلاکتیں اور بڑے پیمانے پر نقصان
طوفان کالماگی کے باعث فلپائن اور ویتنام میں شدید تباہی ہوئی ہے، جہاں اب تک فلپائن میں 188 سے زائد افراد ہلاک اور درجنوں زخمی ہوئے ہیں، جبکہ ویتنام میں کم از کم ایک شخص کے جاں بحق ہونے کی اطلاع ہے۔
رائٹرز کے مطابق طوفان جمعرات کی رات ویتنام کے وسطی ساحلی علاقوں سے ٹکرایا، جس کے نتیجے میں تیز ہواؤں اور موسلادھار بارشوں نے گھروں، درختوں اور بجلی کے نظام کو نقصان پہنچایا۔ حکام کے مطابق تھانہ ہوآ سے کوانگ چی تک کے علاقوں میں بارش کا سلسلہ اب بھی جاری ہے، اور 200 ملی میٹر تک بارش کی پیش گوئی کی گئی ہے۔
طوفان کے اندرونِ ملک بڑھنے کے ساتھ اس کی شدت میں کمی ضرور آئی، تاہم مقامی انتظامیہ نے مزید بارشوں اور لینڈ سلائیڈنگ کے خدشے کے پیشِ نظر الرٹ جاری کر دیا ہے۔ ویتنام نیوز ایجنسی کے مطابق دک لاک صوبے میں ایک شخص ایک گرنے والے مکان کے ملبے تلے دب کر ہلاک ہوا۔
فلپائن میں حکام کے مطابق 135 افراد لاپتا اور 96 زخمی ہوئے ہیں، جب کہ امدادی ٹیمیں متاثرہ علاقوں میں تلاش اور بحالی کا کام جاری رکھے ہوئے ہیں۔ فلپائن سول ایوی ایشن اتھارٹی نے ملک کے تمام ہوائی اڈوں اور فضائی زونز کو ہائی الرٹ پر رکھا ہے، کیونکہ ہفتے کے اختتام پر ایک اور طوفان کے ممکنہ اثرات کی پیش گوئی کی گئی ہے۔
ماہرین کا کہنا ہے کہ کالماگی اس سال جنوبی چین کے سمندر میں بننے والا 13واں طوفان ہے۔ جغرافیائی طور پر ویتنام اور فلپائن پیسیفک طوفانی پٹی (Pacific Typhoon Belt) میں واقع ہیں، اسی باعث یہ ممالک سالانہ متعدد طوفانوں اور شدید موسمی اثرات سے متاثر ہوتے رہتے ہیں، جن میں جانی و مالی نقصانات عام ہیں۔
