لاس اینجلس — یوفوریا اور ڈونی جیسی مشہور فلموں اور سیریز سے شہرت پانے والی عالمی شہرت یافتہ اداکارہ زینڈیایا نے اعتراف کیا ہے کہ بچپن میں ملنے والی شہرت کے منفی اثرات سے بچانے اور انہیں گمراہی سے دور رکھنے میں ان کے والدین نے کلیدی کردار ادا کیا ہے۔ حال ہی میں ایک انٹرویو کے دوران جب ان سے پوچھا گیا کہ انہوں نے ماضی کے دیگر ڈزنی چائلڈ اسٹارز کی طرح تنازعات اور بگڑتے لائف اسٹائل کا شکار ہوئے بغیر خود کو کیسے سنبھالا، تو اداکارہ نے اپنی اس کامیابی کا سہرا اپنے خاندان کی بہترین تربیت اور مضبوط خاندانی اقدار کے سر سجایا۔
زینڈیایا نے گفتگو کرتے ہوئے کہا، "میں بہت خوش قسمت ہوں کہ مجھے ایسے والدین ملے۔” انہوں نے مزید بتایا کہ ان کے خاندان نے ان کی زندگی میں ایسے بنیادی اصول اور اخلاقیات شامل کیں جو ہر موڑ پر ان کی رہنمائی کرتی ہیں۔ اداکارہ کے مطابق ان کے والدین ان کے لیے ایک حفاظتی ڈھال کی طرح رہے، جو بدقسمتی سے بہت سے کم عمر اداکاروں کو میسر نہیں ہوتی۔ اس سیشن کے دوران جب انٹرویو لینے والے نے ہال میں موجود زینڈیایا کی والدہ کی طرف اشارہ کیا تو انہوں نے مسکراتے ہوئے اپنے ڈولے (بائیسیپس) دکھائے، جس پر اداکارہ نے ہنستے ہوئے بتایا کہ ان کی والدہ ان دنوں فٹنس اور سائیکلنگ کی دیوانی ہو چکی ہیں۔ واضح رہے کہ زینڈیایا نے اپنے کیریئر کا آغاز ڈزنی چینل کے شو شیک اٹ اپ سے کیا تھا، جس کے بعد انہوں نے ہالی ووڈ میں پختہ اور سنجیدہ کرداروں کے ذریعے اپنی ایک الگ پہچان بنائی
