نیٹ فلکس کی عالمی شہرت یافتہ کورین سیریز اسکوئڈ گیم کے تیسرے اور آخری سیزن نے ریلیز کے ابتدائی 72 گھنٹوں میں ایک نیا عالمی ریکارڈ قائم کر دیا، جس نے اسٹریمنگ کی دنیا میں ہلچل مچا دی۔
بین الاقوامی میڈیا رپورٹس کے مطابق، اسکوئڈ گیم سیزن 3 کو صرف تین دنوں میں 6 کروڑ 10 لاکھ مرتبہ دیکھا گیا، جس کے بعد یہ نیٹ فلکس کی تاریخ کی سب سے بڑی اوپننگ بن گئی ہے۔ یہ سیزن 27 جون کو جاری کیا گیا تھا۔
اس تیز رفتار مقبولیت کے باعث سیریز دنیا کے 93 ممالک میں پہلے نمبر پر رہی۔ مزید برآں، یہ غیر انگریزی زبان میں بننے والی نویں سب سے زیادہ دیکھی جانے والی سیریز بھی بن گئی ہے۔
نئے سیزن میں کھیلوں کو پہلے سے زیادہ چیلنجنگ اور مناظر کو کہیں زیادہ پرتشدد بنایا گیا ہے، جس پر ناظرین کی رائے ملی جُلی رہی۔ بعض ناظرین نے اسے حقیقت کے قریب تر اور مؤثر قرار دیا، جبکہ دیگر نے مناظر کو غیر ضروری طور پر پُرتشدد سمجھا۔
سیریز کے تخلیق کار ہوانگ ڈونگ ہیوک کا کہنا ہے کہ اس بار کہانی کا محور انسانی جذبہ، اخلاقی کشمکش اور کٹھن فیصلے ہیں، جنہیں زیادہ گہرائی اور نکھار کے ساتھ دکھایا گیا ہے۔
