لاہور: صوبائی دارالحکومت کے علاقے اچھرہ میں 9 سالہ بچی سے جنسی زیادتی کے مقدمے میں پولیس نے ایک ملزم کو گرفتار کر لیا ہے۔
پولیس ترجمان کے مطابق ایس ایچ او اچھرہ الیاس سندھو نے اپنی ٹیم کے ہمراہ فاضلیہ کالونی میں کارروائی کرتے ہوئے ملزم کو حراست میں لیا، جو متاثرہ بچی کا پڑوسی بتایا جاتا ہے۔ ملزم کے خلاف قانون کے مطابق کارروائی کا آغاز کر دیا گیا ہے۔
پولیس کا کہنا ہے کہ متاثرہ بچی کھیلنے کے لیے ملزم کے گھر گئی تھی، جہاں مبینہ طور پر یہ افسوس ناک واقعہ پیش آیا۔ واقعے کے بعد ملزم نے بچی کو دھمکیاں دیں کہ اگر اس نے کسی کو بتایا تو اسے سنگین نتائج کا سامنا کرنا پڑے گا۔ بعد ازاں بچی نے اپنے والد حسنین کو واقعے سے آگاہ کیا، جس پر فوری طور پر پولیس سے رابطہ کیا گیا۔
درخواست موصول ہونے پر ایس پی ماڈل ٹاؤن شہربانو نقوی نے واقعے کی حساس نوعیت کے پیش نظر اے ایس پی گلبرگ کو خصوصی تفتیشی ٹاسک سونپا۔ ایس پی ماڈل ٹاؤن کے مطابق ملزم، جس کی شناخت فاروق کے نام سے ہوئی ہے، کے خلاف مقدمہ درج کر کے تفتیش جینڈر سیل کے حوالے کر دی گئی ہے تاکہ تحقیقات شفاف اور قانون کے مطابق مکمل کی جا سکیں۔
انہوں نے واضح کیا کہ بچوں کے خلاف جرائم کسی صورت برداشت نہیں کیے جائیں گے اور ایسے عناصر کے خلاف قانون کے مطابق سخت کارروائی عمل میں لائی جائے گی۔ پولیس کے مطابق تفتیش میرٹ پر جاری ہے جبکہ متاثرہ بچی کو مکمل قانونی تحفظ فراہم کیا جا رہا ہے۔
