لاہور میں پولیس نے بچے کو ڈھال بنا کر لوٹ مار کرنے والے چور و ڈکیت گروہ کو گرفتار کر لیا۔ یہ کارروائی ڈی آئی جی آپریشنز کی جانب سے اے ایس پی گلبرگ رجندر میگھوار کو دیے گئے خصوصی ٹاسک پر عمل درآمد کے تحت کی گئی۔
پولیس کے مطابق ایس ایچ او گلبرگ تیمور عباس نے اپنی ٹیم کے ہمراہ سلطان پارک سے ملزمان کو ٹریس کر کے گرفتار کیا۔ ملزمان خود کو فیملی ظاہر کر کے مختلف مارکیٹس میں شہریوں کی ریکی کرتے تھے۔
پولیس حکام کا کہنا ہے کہ موقع ملتے ہی ملزمان شہریوں کے موبائل فونز، موٹر سائیکلیں اور دیگر قیمتی سامان چرا لیتے تھے۔ سی سی ٹی وی فوٹیج میں ملزمان کو واردات کے بعد فرار ہوتے دیکھا جا سکتا ہے۔
مزید فوٹیج میں ملزمان کو بچے کے ہمراہ موٹر سائیکل پر فرار ہوتے ہوئے بھی دیکھا گیا، جس سے ظاہر ہوتا ہے کہ وہ گرفتاری سے بچنے کے لیے بچے کا استعمال کرتے تھے۔
پولیس نے ملزمان کے قبضے سے دو موبائل فونز، چوری شدہ موٹر سائیکل اور ایک پستول برآمد کر لیا ہے۔ ایس پی ماڈل ٹاؤن شہربانو نقوی نے کامیاب کارروائی پر ایس ایچ او گلبرگ تیمور عباس اور ان کی ٹیم کو شاباش دی۔
ایس پی ماڈل ٹاؤن کے مطابق گرفتار ملزمان صدام اور یوسف کے خلاف مقدمہ درج کر لیا گیا ہے جبکہ تفتیش جاری ہے۔
