لاہور: سبزہ زار پولیس نے کالج جانے والی طالبہ کو ہراساں کرنے اور اغوا کی دھمکیاں دینے والے دو ملزمان کو گرفتار کر لیا۔
پولیس کے مطابق اعوان ٹاؤن کی رہائشی طالبہ کالج کے لیے جا رہی تھی کہ موٹرسائیکل سوار دو ملزمان اس کے پیچھے لگ گئے۔ ملزمان مبینہ طور پر آوازیں کستے رہے اور طالبہ سے موبائل فون نمبر مانگتے رہے۔
پولیس کا کہنا ہے کہ طالبہ کے انکار پر ملزمان نے اغوا کی دھمکیاں دیں اور زبردستی ہاتھ پکڑنے کی کوشش کی۔ طالبہ کے شور مچانے پر ملزمان فرار ہونے کی کوشش کرنے لگے تاہم پولیس نے دونوں کو موقع پر گرفتار کر لیا۔
طالبہ کے والد زاہد کی مدعیت میں ملزمان سعد اور غلام فرید کے خلاف مقدمہ درج کر لیا گیا ہے۔ پولیس کے مطابق گرفتار ملزمان کو مزید تفتیش کے لیے انویسٹی گیشن ونگ کے حوالے کر دیا گیا ہے۔
ایس پی اقبال ٹاؤن ڈاکٹر محمد عمر نے ایس ایچ او سبزہ زار اور پولیس ٹیم کی بروقت کارروائی کو سراہتے ہوئے کہا کہ خواتین کو ہراساں کرنے والے عناصر کسی رعایت کے مستحق نہیں۔
