اسلام آباد: سیکورٹیز اینڈ ایکسچینج کمیشن آف پاکستان (ایس ای سی پی) نے سوشل میڈیا اور واٹس ایپ گروپس کے ذریعے غیر قانونی سرمایہ کاری اور ٹریڈنگ پلیٹ فارمز کو فروغ دینے والے متعدد غیر مجاز افراد اور گروپس کی نشاندہی کر دی ہے اور عوام کو سختی سے خبردار کیا ہے کہ لائسنس یافتہ بروکریج ہاؤسز، مشہور شخصیات، فن فلوئنسرز اور بروکریج ایگزیکٹوز کے ناموں کا غلط استعمال کرنے والی ایپلی کیشنز سے دور رہیں۔
ایس ای سی پی کے مطابق یہ جعلی پلیٹ فارمز لائسنس یافتہ بروکرز کی نقالی کر رہے ہیں اور عوام کو گمراہ کرنے کے لیے مشہور شخصیات اور مالی ماہرین کی تصاویر استعمال کر رہے ہیں۔ کمیشن نے خصوصی طور پر TSLWEA/TSL WEALTH نامی موبائل و ویب ایپلیکیشن کی نشاندہی کی ہے، جو غلط طور پر خود کو ٹاپ سیکیورٹیز لمیٹڈ سے منسوب کر رہی ہے۔
مزید برآں، A103–Topline Stock Strategies Hub نامی واٹس ایپ گروپ بھی اسی ایپلیکیشن کو ٹاپ سیکیورٹیز لمیٹڈ کے ساتھ جوڑ کر اس کے ذریعے سرمایہ کاری کی ترغیب دے رہا ہے، حالانکہ اس کا کمپنی سے کوئی تعلق نہیں۔
ایس ای سی پی نے واضح کیا کہ TSLWEA/TSL WEALTH نہ تو لائسنس یافتہ ہے اور نہ ہی اسے پاکستان اسٹاک ایکسچینج یا کسی بھی ریگولیٹڈ مارکیٹ میں سرمایہ کاری یا ٹریڈنگ پلیٹ فارم چلانے کی اجازت ہے۔
ریگولیٹر کے مطابق سوشل میڈیا پر اے آئی سے تیار کیے گئے گمراہ کن اشتہارات کا سلسلہ بھی دیکھنے میں آیا ہے جن میں مشہور شخصیات، فن فلوئنسرز اور معروف بروکریج ہاؤسز کے افسران کی تصاویر استعمال کر کے عوام کو واٹس ایپ گروپس میں شامل ہونے اور لسٹیڈ کمپنیوں میں سرمایہ کاری کے نام پر بہکایا جا رہا ہے۔
ایس ای سی پی نے خبردار کیا کہ ایسے تمام گروپس غیر قانونی ہیں اور ان میں شامل ہونے والے افراد مالی نقصان کے بڑے خطرے سے دوچار ہو سکتے ہیں۔ عوام کو مشورہ دیا گیا ہے کہ وہ صرف ایس ای سی پی سے منظور شدہ سیکیورٹیز اور فیوچرز بروکرز سے رابطہ کریں، جن کی فہرست پی ایس ایکس اور پی ایم ای ایکس کی سرکاری ویب سائٹس پر موجود ہے۔
کمیشن نے سرمایہ کاروں پر زور دیا کہ وہ محتاط رہیں، جعلی پلیٹ فارمز سے بچیں اور کسی بھی سروس کو اپنے پیسے یا ذاتی معلومات دینے سے پہلے اس کی اصل حیثیت کی تصدیق ضرور کریں۔ ایس ای سی پی نے غیر مجاز پلیٹ فارمز کی رپورٹ متعلقہ اداروں، گوگل، پی ٹی اے اور قانون نافذ کرنے والے حکام کو بھی بھیج دی ہے۔
عوام کو سختی سے تنبیہ کی گئی ہے کہ وہ TSLWEA/TSL WEALTH یا کسی بھی ایسے فرد یا گروپ کے ذریعے رقم جمع نہ کروائیں جو غیر قانونی سرمایہ کاری پلیٹ فارمز کی تشہیر کر رہے ہوں۔
