پاکستان کے فاسٹ بولر شاہین شاہ آفریدی اس بار صرف گیند سے ہی نہیں بلکہ بیٹ سے بھی میدان مار رہے ہیں۔ ایشیا کپ کے جاری ایونٹ میں ان کی جارحانہ بیٹنگ نے سب کو حیران کر دیا ہے، حتیٰ کہ بھارتی اسپنر کلدیپ یادیو بھی داد دینے پر مجبور ہوگئے۔
بھارت کے خلاف ہائی وولٹیج میچ میں جب پاکستان کا اسکور 83 پر 7 کھلاڑی آؤٹ تھا، اس نازک موقع پر شاہین نے کریز سنبھالا اور صرف 16 گیندوں پر ناٹ آؤٹ 33 رنز جڑ دیے۔ ان کی اننگز میں چار شاندار چھکے شامل تھے جنہوں نے نہ صرف اسٹیڈیم میں جوش بھر دیا بلکہ پاکستان کے مداحوں کو بھی ایک نئی امید دلائی۔
اس کے بعد متحدہ عرب امارات کے خلاف میچ میں بھی شاہین کا بیٹ خوب بولا۔ انہوں نے محض 14 گیندوں پر 29 رنز اسکور کیے، جن میں تین چوکے اور دو چھکے شامل تھے۔ اگرچہ میچ دباؤ والا تھا، مگر شاہین کی یہ اننگز پاکستان کے لیے قیمتی ثابت ہوئی اور ٹیم کے حوصلے بلند کیے۔
بھارتی اسپنر کلدیپ یادیو نے پریس کانفرنس کے دوران شاہین کی بیٹنگ کی کھل کر تعریف کی۔ ان کا کہنا تھا:
“وہ گیند کو بہت زبردست طریقے سے ہِٹ کر رہے ہیں۔ بطور بولر آپ بیٹسمین کو پڑھنے کی کوشش کرتے ہیں، لیکن کبھی کبھار جو شاٹس انہوں نے کھیلے وہ روکنا مشکل ہو جاتا ہے۔”
شاہین شاہ آفریدی پہلے ہی دنیا کے خطرناک ترین فاسٹ بولرز میں شمار ہوتے ہیں، لیکن حالیہ کارکردگی نے انہیں ایک قیمتی "لوئر آرڈر ہٹر” کے طور پر بھی نمایاں کر دیا ہے۔ پاکستان کے لیے یہ خوش آئند بات ہے، کیونکہ بڑے میچز میں ہر رن اہمیت رکھتا ہے۔ مداحوں کے لیے شاہین کا یہ نیا روپ ایک اور وجہ ہے کہ وہ جدید کرکٹ کے سب سے دلچسپ کھلاڑیوں میں شمار ہوتے ہیں۔
