بالی ووڈ کے سپر اسٹار سلمان خان کے مقبول ریئلٹی شو بگ باس 19 کو قانونی مسائل کا سامنا ہے۔ کاپی رائٹ لائسنسنگ کمپنی ’فونوگرافک پرفارمنس لمیٹڈ‘ (پی پی ایل) نے شو کے پروڈیوسرز کو دو کروڑ روپے کے ہرجانے کا نوٹس بھیج دیا ہے۔
پی پی ایل کا مؤقف ہے کہ پروڈیوسرز نے چکنی چمیلی اور دھت تیری کی سمیت کئی مشہور گانے شو میں بغیر پبلک پرفارمنس لائسنس کے استعمال کیے۔ یہ نوٹس 19 ستمبر کو جاری کیا گیا اور اس میں اینڈیمول شائن انڈیا کے ساتھ ڈائریکٹرز تھامس گوسیٹ، نکولس چزارین اور دیپک دھر کو نامزد کیا گیا ہے۔
شو اس وقت اپنے عروج پر ہے، جس میں اشنور کور، ذیشان قادری، تانیا متل اور آویز دربار سمیت کئی شخصیات شریک ہیں۔ پی پی ایل نے بقیہ لائسنس فیس کی ادائیگی کے ساتھ ساتھ دو کروڑ روپے ہرجانے کا بھی مطالبہ کیا ہے۔
ماہرین کے مطابق یہ معاملہ بھارتی انٹرٹینمنٹ انڈسٹری میں کاپی رائٹ قوانین کی سخت پاسداری پر ایک بڑی بحث کو جنم دے سکتا ہے اور دیگر پروڈکشنز کے لیے وارننگ بھی ثابت ہوگا۔
سلمان خان کی میزبانی میں نشر ہونے والا بگ باس بھارت کے سب سے مقبول ریئلٹی شوز میں شمار ہوتا ہے۔ اب دیکھنا یہ ہے کہ پروڈیوسرز اس قانونی چیلنج سے کس طرح نمٹتے ہیں اور آیا یہ تنازعہ شو کے شیڈول پر اثر انداز ہوگا یا نہیں۔
