بالی ووڈ کی مقبول ترین کامیڈی فلم ہیرا پھیری کےڈائریکٹر پریادرشن نے ایک حیران کن انکشاف کرتے ہوئے بتایا ہے کہ یہ فلم دراصل ایک مکمل ریمیک تھی، جس میں کوئی بھی ڈائیلاگ اصل نہیں تھا بلکہ سب کا ترجمہ کیا گیا تھا۔
68 سالہ ہدایت کار نے ایک انٹرویو میں کہا: ’’میں عام طور پر ریمیکس میں تبدیلیاں کرتا ہوں، لیکن ہیرا پھیری فریم ٹو فریم کاپی تھی۔ اس کے لیے ہندی میں کوئی نیا ڈائیلاگ نہیں لکھا گیا، سب کچھ ترجمہ شدہ تھا۔‘‘
پریادرشن نے اپنے طریقہ کار پر بات کرتے ہوئے کہا کہ وہ کبھی بھی اصل فلم اپنے اداکاروں کو نہیں دکھاتے۔ ان کے مطابق: ’’میں نے یہ غلطی صرف ایک بار کی تھی جب ملیالم فلموں کو تیلگو میں ریمیک کیا۔ اداکاروں نے موہن لال کی نقل کرنے کی کوشش کی، حالانکہ ہر ایک کی باڈی لینگویج الگ ہوتی ہے۔ اسی لیے میں اصل فلم کبھی نہیں دکھاتا۔‘‘
2000 میں ریلیز ہونے والی ہیرا پھیری دراصل 1989 کی ملیالم فلم رامجی راؤ اسپیکنگ کا ریمیک تھی، جس میں اکشے کمار، سنیل شیٹی اور پریش راول نے مرکزی کردار ادا کیے۔ فلم شائقین کو اتنی پسند آئی کہ اس کے دو سیکوئلز بھی بنائے گئے اور آج بھی سوشل میڈیا پر اس کے ڈائیلاگ اور سینز میمز کی شکل میں وائرل ہوتے ہیں۔
یہ بیان نہ صرف مداحوں کے لیے حیرت انگیز ہے بلکہ بالی ووڈ میں ریمیکس کے عمل پر بھی روشنی ڈالتا ہے، کہ کس طرح کامیاب فلم کو ایک نئی زبان اور ثقافت کے مطابق ڈھالا جا سکتا ہے۔
