بھارتی پنجابی سپر اسٹار دلجیت دوسانجھ اور پاکستانی اداکارہ ہانیہ عامر کی فلم سردار جی 3 نے پاکستان میں باکس آفس پر نیا ریکارڈ قائم کرتے ہوئے سب سے زیادہ کمائی کرنے والی بھارتی فلم کا اعزاز حاصل کر لیا ہے۔
تازہ ترین اعداد و شمار کے مطابق، فلم نے ریلیز کے پہلے ہفتے میں 21 کروڑ پاکستانی روپے کا بزنس کیا، دوسرے ہفتے میں 9.50 کروڑ، جب کہ تیسرے ہفتے کے صرف ایک دن میں مزید 10 کروڑ روپے کما لیے۔ اب تک مجموعی طور پر سردار جی 3 نے پاکستان میں 40.51 کروڑ روپے (12.23 کروڑ بھارتی روپے) کی کمائی کر لی ہے، جس سے یہ فلم کیری آن جٹہ 3 کو پیچھے چھوڑ چکی ہے۔
دلچسپ بات یہ ہے کہ بھارت میں ریلیز پر پابندی کے باوجود فلم نے بین الاقوامی سطح پر، خصوصاً پاکستان میں، شاندار کارکردگی دکھائی۔ پاکستانی سینماؤں میں پنجابی فلموں کو اب بھی ریلیز کی اجازت حاصل ہے، کیونکہ بیشتر فلم ساز برطانیہ یا کینیڈا سے وابستہ ہوتے ہیں، جس کی وجہ سے ان پر مقامی پابندیاں لاگو نہیں ہوتیں۔
تجزیہ کاروں کا کہنا ہے کہ فلم کی موجودہ رفتار کو دیکھتے ہوئے سردار جی 3 کا بزنس آئندہ ہفتوں میں 60 کروڑ پاکستانی روپے تک پہنچنے کی توقع ہے۔ فلم کی کامیڈی، اسٹار پاور اور تعطیلات کے دوران ریلیز نے اس کے باکس آفس پرفارمنس کو مزید مضبوط بنایا ہے۔
یہ کامیابی نہ صرف فلمی صنعت کے لیے ایک حوصلہ افزا علامت ہے بلکہ پاکستانی مارکیٹ میں پنجابی فلموں کی مقبولیت کو بھی ظاہر کرتی ہے
