پاکستان کے معروف کامیڈین اور ٹی وی میزبان تابش ہاشمی اب بڑے پردے پر انٹری دینے جا رہے ہیں۔ ٹی وی اور اسٹیج پر اپنی حاضر جوابی اور مزاح سے شہرت حاصل کرنے والے تابش ہاشمی پہلی مرتبہ فلمی دنیا کا حصہ بننے جا رہے ہیں۔
صنعتی ذرائع کے مطابق تابش ہاشمی ایک آنے والی کامیڈی فلم میں فہد مصطفیٰ اور ماہرہ خان کے ساتھ جلوہ گر ہوں گے۔ یہ پروجیکٹ بگ بینگ انٹرٹینمنٹ کے بینر تلے تیار کیا جا رہا ہے جبکہ ہدایتکاری کے فرائض نئے فلم ساز بلال عاطف خان انجام دے رہے ہیں۔
اگرچہ فلم کے بارے میں تاحال سرکاری اعلان سامنے نہیں آیا، تاہم ذرائع کا کہنا ہے کہ یہ ایک منفرد کامیڈی فلم ہوگی۔ فلم کے نام اور ریلیز کی تاریخ کو ابھی خفیہ رکھا گیا ہے لیکن اس نے شوبز حلقوں میں پہلے ہی خاصی دلچسپی پیدا کر دی ہے۔
یہ تابش ہاشمی کی پہلی فلم ہوگی۔ اس سے قبل وہ اپنے مقبول ٹاک شو ٹو بی ہونسٹ اور ڈیجیٹل پلیٹ فارمز پر مزاحیہ پرفارمنسز کے ذریعے شہرت حاصل کر چکے ہیں۔ مداحوں کو امید ہے کہ ان کا یہ نیا سفر بھی کامیاب ثابت ہوگا اور ان کی مزاحیہ اداکاری فلمی پردے پر بھی اسی طرح مقبولیت سمیٹے گی
