پشاور: خیبرپختونخوا کے نومنتخب وزیراعلیٰ سہیل آفریدی نے آج اپنے عہدے کا حلف اٹھا لیا۔ حلف برداری کی تقریب گورنر ہاؤس پشاور میں منعقد ہوئی، جہاں گورنر فیصل کریم کنڈی نے ان سے حلف لیا۔ یہ اقدام پشاور ہائیکورٹ کے حکم کے مطابق عمل میں آیا۔
تقریب میں اسپیکر خیبرپختونخوا اسمبلی بابر سلیم سواتی، پاکستان تحریک انصاف (پی ٹی آئی) کے اراکین قومی و صوبائی اسمبلی، آئی جی پولیس، چیف سیکریٹری اور دیگر اعلیٰ حکام نے شرکت کی۔ پنڈال میں بڑی تعداد میں پی ٹی آئی کے کارکنان موجود تھے جو اپنے قائد کے حق میں نعرے لگا رہے تھے۔
سہیل آفریدی کی حلف برداری سے قبل صوبے میں سیاسی کشیدگی جاری تھی۔ سابق وزیراعلیٰ علی امین گنڈاپور نے 8 اکتوبر کو استعفیٰ دیا تھا، تاہم گورنر فیصل کریم کنڈی نے دونوں استعفوں پر دستخطوں میں فرق ہونے پر اعتراض اٹھایا اور نیا وزیراعلیٰ منتخب کرنے کو قبل از وقت قرار دیا۔
بعدازاں پشاور ہائیکورٹ نے حکم دیا کہ 15 اکتوبر کی شام تک نومنتخب وزیراعلیٰ سے حلف لیا جائے، اور اگر گورنر ایسا نہ کریں تو اسپیکر اسمبلی کو اختیار دیا جائے کہ وہ حلف لیں۔ عدالتی فیصلے پر عمل کرتے ہوئے گورنر فیصل کریم کنڈی گزشتہ روز کراچی سے پشاور پہنچے اور آج سہیل آفریدی سے حلف لیا۔
اس سے قبل 13 اکتوبر کو خیبرپختونخوا اسمبلی کے اجلاس میں سہیل آفریدی کو 90 ووٹوں سے صوبے کا 30واں وزیراعلیٰ منتخب کیا گیا تھا۔
