“راوت میں برطانیہ پلٹ شخص کی مبینہ اجتماعی زیادتی؛ مقدمہ درج، ملزمان کی تلاش جاری”

راولپنڈی: تھانہ روات کی حدود میں برطانیہ پلٹ شخص نے مبینہ طور پر اپنے ساتھیوں کے ہمراہ خاتون کو اجتماعی زیادتی کا نشانہ بنایا۔ متاثرہ خاتون کی درخواست پر مقدمہ درج کر لیا گیا ہے اور پولیس نے ملزمان کی گرفتاری کے لیے کارروائی شروع کر دی ہے۔

ایف آئی آر کے مطابق خاتون نے بیان دیا کہ وہ گزشتہ ڈیڑھ سال سے اپنی والدہ کے ساتھ ملزم سلیم اختر کے گھر کام کر رہی تھی، جبکہ ملزم نے ایک سال قبل بھی اس سے جبراً زیادتی کی تھی۔ خاتون کا کہنا ہے کہ 20 نومبر کو ملزم اسے خریداری کے بہانے گاڑی میں ساتھ لے گیا اور ایک نجی ہاؤسنگ سوسائٹی میں قائم ڈیرے پر زیادتی کا ارتکاب کیا۔

متاثرہ خاتون نے مزید بتایا کہ مرکزی ملزم شاہد سلیم کے بعد اس کے ساتھی رضوان اور ایک نامعلوم شخص نے بھی اسے جنسی درندگی کا نشانہ بنایا۔

پولیس کے مطابق متاثرہ کا طبی معائنہ مکمل کر لیا گیا ہے، جس کے بعد مقدمہ درج کر کے ملزمان کی تلاش کے لیے چھاپے مارے جا رہے ہیں۔