سندھ رینجرز نے حب ریور روڈ ماڑی پور پر اسنیپ چیکنگ کے دوران کارروائی کرتے ہوئے مسافر بس سے چار مبینہ اسمگلرز کو گرفتار کر لیا اور بڑی مقدار میں نان کسٹم پیڈ سگریٹس برآمد کر لی ہیں۔
ترجمان رینجرز کے مطابق ملزمان مسافر بس میں بنائے گئے خفیہ خانوں کے ذریعے اسمگل شدہ سامان کراچی منتقل کر رہے تھے۔ گرفتار افراد کی شناخت سید حبیب اللہ ولد تاج ملوک، سید نوید احمد ولد سید جمیل احمد، ثناء اللہ ولد عبدالشکور اور ولی جان ولد عبداللہ کے ناموں سے ہوئی ہے۔
کارروائی کے دوران بس کے خفیہ خانوں سے 47 ہزار 680 پیکٹ نان کسٹم پیڈ سگریٹس، چار موبائل فونز اور نقدی برآمد کی گئی۔ ملزمان نے انکشاف کیا کہ وہ بلوچستان کے ہزار گنجی بس اسٹینڈ سے یہ سامان یوسف گوٹھ ٹرمینل کراچی لے جا رہے تھے۔
رینجرز کے مطابق تفتیش کے دوران پتہ چلا کہ بس مالکان نے اسمگلنگ کے لیے خفیہ خانے تیار کر رکھے ہیں۔ ملزم ولی جان یوسف گوٹھ بس ٹرمینل پر منشی کے طور پر خفیہ خانے بنوانے کے معاملات دیکھتا ہے، جب کہ ملزم ثناء اللہ بلوچستان سے اشیا کلیئر کروا کر حب سٹی کے گودام میں رکھوانے کا ذمہ دار ہے۔
رینجرز کا کہنا ہے کہ بس مالکان اور ان کے ساتھیوں کی گرفتاری کے لیے چھاپے جاری ہیں، جب کہ گرفتار ملزمان اور برآمد شدہ سامان کو مزید قانونی کارروائی کے لیے کسٹم حکام کے حوالے کر دیا گیا ہے۔
