کراچی: شہر میں ایک اور بے قابو ڈمپر نے جان لیوا حادثہ کردیا، جس کے نتیجے میں رکشا ڈرائیور جاں بحق جبکہ ہائی ایس کے ڈرائیور سمیت متعدد افراد زخمی ہوگئے۔
پولیس کے مطابق حادثہ شاہ لطیف ٹاؤن میں نیشنل ہائی وے پر پیش آیا جہاں تیز رفتار ڈمپر نے رکشا، ہائی ایس وین اور کیبن کو روند ڈالا۔ رکشا ڈرائیور موقع پر ہی دم توڑ گیا جبکہ دیگر افراد زخمی حالت میں اسپتال منتقل کیے گئے۔
ٹریفک پولیس کی روڈ ایکسیڈنٹ اینالیسز ٹیم نے جائے وقوع کا جائزہ لینے کے بعد حادثے کی ذمہ داری ڈمپر کے ڈرائیور پر عائد کی، جسے تیز رفتاری اور غفلت کا مرتکب قرار دیا گیا۔ ڈمپر میں ٹریکر نہ ہونے پر گاڑی کے مالک شیر زادہ پر ایک لاکھ روپے جرمانہ عائد کرتے ہوئے ای چالان جاری کردیا گیا۔
شاہ لطیف ٹاؤن پولیس نے ڈرائیور محمد حسن اور گاڑی کے مالک کے خلاف قتل بالسبب سمیت متعدد دفعات کے تحت مقدمہ درج کرلیا ہے۔ پولیس کا کہنا ہے کہ اناڑی ڈرائیور نے ہفتے کی صبح غفلت سے گاڑی چلاتے ہوئے سنگین حادثہ کیا۔
ترجمان ٹریفک پولیس نے بتایا کہ کراچی میں بغیر ٹریکر ڈمپرز اور واٹر ٹینکرز کے چلنے پر مکمل پابندی عائد کر دی گئی ہے، اور صرف وہی گاڑیاں سڑکوں پر آسکیں گی جن میں ٹریکر نصب ہو اور جن کی نگرانی ٹریفک پولیس کرتی ہو۔
حادثے کی رپورٹ کے مطابق ہائی ایس ڈرائیور عبدالفتح شدید زخمی ہے، جبکہ دیگر زخمیوں میں کیبن شاپ کے مالک علی حسن شاہ اور دونوں گاڑیوں کے چار مسافر شامل ہیں۔ ڈمپر کا فٹنس سرٹیفیکٹ بھی تاحال سامنے نہیں آیا۔
