کراچی — پاکستان کی خواجہ سرا کمیونٹی نے اعلان کیا ہے کہ تیسرا سالانہ ہیجڑا فیسٹیول 25 اکتوبر 2025ء بروز ہفتہ کراچی میں منعقد ہوگا، جس میں پاکستان سمیت دنیا بھر سے خواجہ سرا افراد بڑی تعداد میں شرکت کریں گے۔
یہ اعلان فیسٹیول کی آرگنائزنگ کمیٹی نے، جس میں معروف ٹرانس جینڈر ایکٹوسٹس کامی چوہدری، ڈاکٹر سارہ گِل اور دیگر شامل ہیں، ہفتے کو کراچی پریس کلب میں پریس کانفرنس کے دوران کیا۔
کامی چوہدری اور ڈاکٹر سارہ گِل نے بتایا کہ ہیجڑا فیسٹیول برنس گارڈن، کراچی میں دوپہر 2 بجے شروع ہوگا۔
انہوں نے کہا کہ اس سال فیسٹیول کا تھیم ماحولیات کے تحفظ سے منسوب کیا گیا ہے، جس کا نعرہ ہے:
"ہم کھڑے ہیں اپنی شناخت، وقار، آزادی اور اپنی زمین کے لیے۔”
ٹرانس جینڈر رہنماؤں نے کہا کہ ماحولیات کی تباہ کاریوں سے خواجہ سرا کمیونٹی بھی متاثر ہوتی ہے، اس لیے وہ ماحول کے تحفظ کی جدوجہد میں پوری قوم اور دنیا کے ساتھ کھڑی ہے۔
ان کا کہنا تھا کہ فیسٹیول کا مقصد خواجہ سرا کمیونٹی کو خوشی اور یکجہتی کا موقع فراہم کرنا اور ان کے سماجی و انسانی حقوق کے پیغام کو اجاگر کرنا ہے۔
انہوں نے واضح کیا کہ یہ فیسٹیول کسی کے خلاف نہیں بلکہ سب کے لیے محبت، قبولیت اور ہم آہنگی کا پیغام ہے۔
کامی چوہدری اور ڈاکٹر سارہ گِل نے بلدیہ عظمیٰ کراچی، انتظامیہ، سندھ پولیس اور دیگر متعلقہ اداروں کا فیسٹیول کے انعقاد میں تعاون پر شکریہ ادا کیا۔
