سکھر: سکھر میں مبینہ پولیس مقابلے کے دوران دو ڈاکو ہلاک ہوگئے۔ ایس ایس پی کے مطابق ہلاک ہونے والوں میں سلطان شاہ اور اس کا بیٹا شامل ہیں جو پولیس سے فائرنگ کے تبادلے میں مارے گئے، جبکہ ایک اہلکار زخمی ہوا۔
پولیس کے مطابق سلطان شاہ کے خلاف پولیس مقابلوں اور ڈکیتیوں کے 48 سے زائد مقدمات درج تھے، جبکہ سندھ حکومت نے اس کے سر کی قیمت 20 لاکھ روپے مقرر کر رکھی تھی۔
اہلکاروں کا کہنا ہے کہ سلطان شاہ نے پہلے ہتھیار ڈال دیے تھے، تاہم جیل سے رہائی کے بعد دوبارہ جرائم کی راہ اختیار کرلی۔ حال ہی میں روہڑی میں ڈکیتی کے دوران ملزمان نے ایک بچے کو زخمی کیا تھا۔
پولیس حکام کے مطابق سرینڈر پالیسی کے تحت ہتھیار ڈالنے کے بعد جو دوبارہ جرائم کی دنیا میں قدم رکھے گا، اس کے خلاف سخت کارروائی کی جائے گی۔
