کراچی: شہر قائد کے علاقے شاہ لطیف ٹاؤن میں افسوسناک واقعہ پیش آیا، جہاں 20 لاکھ روپے قرض واپس مانگنے والے شخص کو بہیمانہ طریقے سے قتل کر دیا گیا۔
پولیس کے مطابق گھر سے ایک تشدد زدہ لاش برآمد ہوئی جس کی شناخت 45 سالہ عامر قریشی کے نام سے ہوئی۔ مقتول کو 20 لاکھ روپے کی رقم واپس دینے کے بہانے گھر بلایا گیا تھا۔
پولیس نے خاتون اور بچے سمیت 5 افراد کو حراست میں لے لیا ہے۔ ابتدائی تحقیقات میں معلوم ہوا کہ مقتول کو تشدد اور ہتھوڑے کے وار سے قتل کیا گیا۔ ابتدا میں واقعہ فائرنگ کا بتایا گیا تھا، تاہم مقتول کے جسم پر گولی کا کوئی نشان نہیں ملا۔
پولیس کے مطابق مقتول اور گھر کے مالک کے درمیان لین دین کا تنازع چل رہا تھا۔ ملزم نے مقتول کو پیسوں کی واپسی کے بہانے بلایا اور بعد میں قتل کر کے لاش گھگھر پھاٹک کے قریب پھینکنے کی منصوبہ بندی کی تھی۔
مزید یہ کہ ملزم نے مقتول کی کار چھپا کر اغوا کا ڈرامہ بھی رچایا، جبکہ پولیس شام سے مقتول کی تلاش میں مصروف تھی۔
پولیس نے گھر کے باہر لگے سی سی ٹی وی کیمروں کی فوٹیج چیک کی تو شبہ ہوا۔ جب گھر کی تلاشی لی گئی تو عامر قریشی کی تشدد زدہ لاش برآمد ہوئی اور آلۂ قتل بھی ضبط کر لیا گیا۔
پولیس نے گھر میں موجود تمام افراد کو حراست میں لے کر تھانے منتقل کر دیا ہے، جبکہ مزید تفتیش جاری ہے۔
