خیبرپختونخوا کے ضلع صوابی میں پولیس نے اندھے قتل کا معمہ حل کرتے ہوئے باپ کے قتل میں ملوث سفاک بیٹے کو گرفتار کر لیا۔ ایکسپریس نیوز کے مطابق تھانہ زیدہ پولیس نے کارروائی کرتے ہوئے ملزم کو آلۂ قتل پستول سمیت حراست میں لے لیا۔
پولیس کے مطابق ملزم نے اپنے والد کے قتل کے بعد نامعلوم افراد کے خلاف جھوٹی ایف آئی آر درج کرائی تھی، جس میں دعویٰ کیا گیا تھا کہ 52 سالہ عباداللہ کو فجر کی نماز کے لیے مسجد جاتے ہوئے نامعلوم افراد نے فائرنگ کرکے قتل کر دیا۔
دردناک واقعے کا نوٹس لیتے ہوئے ڈسٹرکٹ پولیس آفیسر صوابی ضیاءالدین احمد نے اصل حقائق سامنے لانے کے لیے خصوصی ٹیم تشکیل دی۔ ڈی ایس پی سرکل صوابی اعجاز آبازئی کی سربراہی میں ایس ایچ او فاروق خان اور تفتیشی ٹیم نے جدید سائنسی اور تکنیکی بنیادوں پر تفتیش کرتے ہوئے چند گھنٹوں میں حقیقی ملزم تک رسائی حاصل کی اور مقتول کے بیٹے عیان اللہ کو گرفتار کرلیا۔
تفتیش کے دوران انکشاف ہوا کہ قتل کوئی بیرونی کارروائی نہیں تھا بلکہ بیٹے نے معمولی گھریلو ناچاقی اور رنجش کے باعث اپنے والد کو فائرنگ کرکے قتل کیا۔ پولیس نے مزید تفتیش شروع کر دی ہے۔
