علیگڑھ انسٹیٹیوٹ آف ٹیکنالوجی (AIT) کراچی کے شعبہ آرکیٹیکچر و سول ٹیکنالوجی کے زیرِ اہتمام منعقدہ آرٹ اینڈ کرافٹ نمائش نے تعلیمی اور فنی حلقوں کی بھرپور توجہ حاصل کرلی۔ رنگا رنگ اور تخلیقی تقریب میں تقریباً 70 طلبہ و طالبات نے حصہ لیا اور پینٹنگز، آرکیٹیکچرل ماڈلز اور جدید کرافٹ ورک کے ذریعے اپنی صلاحیتوں کا شاندار مظاہرہ کیا۔
نمائش میں 50 سے زائد تخلیقی فن پارے پیش کیے گئے، جو فن اور ٹیکنالوجی کے حسین امتزاج کی عکاسی کر رہے تھے۔ شرکاء اور مہمانانِ خصوصی نے طلبہ کے کام کو بے حد سراہا۔ نمائش کو چار مختلف کیٹیگریز میں تقسیم کیا گیا تھا جبکہ کرافٹ سیکشن میں ماڈل میکنگ اور تخلیقی ڈیزائنز خصوصی توجہ کا مرکز رہے۔ تقریب کا افتتاح پرنسپل علیگڑھ انسٹیٹیوٹ شاہد جمیل نے کیا۔
جیوری کے فرائض نامور فائن آرٹسٹ اور ڈیزائن اسٹوڈیو انسٹرکٹر ثانیہ عارف نے انجام دیے۔ ثانیہ عارف ایک بین الاقوامی شہرت یافتہ آرٹسٹ ہیں جو 22 ممالک میں پاکستان کی نمائندگی کر چکی ہیں۔ انہیں متعدد اعزازات سے نوازا جا چکا ہے جبکہ ان کے فن پارے چین کے نیشنل میوزیم اور ونٹر اولمپکس جیسے عالمی پلیٹ فارمز پر بھی جگہ پا چکے ہیں۔ وہ گزشتہ 19 برس سے شعبۂ آرٹ سے وابستہ ہیں۔
تقریب کے مہمانِ خصوصی چیئرمین گورننگ باڈی و چانسلر سر سید یونیورسٹی محمد اکبر علی خان تھے، جبکہ کنوینر سید محمد محسن کاظم اور پرنسپل شاہد جمیل بھی اس موقع پر موجود تھے۔ تقریب کے اختتام پر نمایاں کارکردگی دکھانے والے طلبہ میں انعامات اور نقد رقوم تقسیم کی گئیں تاکہ ان کی حوصلہ افزائی کی جا سکے۔
اپنے خطاب میں محمد اکبر علی خان نے طلبہ کی تخلیقی صلاحیتوں کو سراہتے ہوئے کہا کہ یہ کامیابیاں ان کی محنت، اساتذہ کی رہنمائی اور والدین کی بھرپور معاونت کا نتیجہ ہیں، جو ان کے روشن مستقبل کی بنیاد بنیں گی۔ انہوں نے کہا کہ ایسی مثبت اور تخلیقی سرگرمیاں طلبہ کو قومی اور بین الاقوامی سطح پر اپنی شناخت بنانے کے مواقع فراہم کرتی ہیں۔
پرنسپل شاہد جمیل نے نمائش کو ادارے کے اعلیٰ تعلیمی معیار اور طلبہ کی تخلیقی سوچ کا واضح ثبوت قرار دیا۔ کنوینر سید محمد محسن کاظم نے کہا کہ آرکیٹیکچر پروگرام میں اس سال داخلوں میں نمایاں اضافہ ہوا ہے، جس میں اس نوعیت کی سرگرمیوں کا اہم کردار ہے۔ ان کا کہنا تھا کہ اگرچہ یہ پروگرام نصاب کا حصہ نہیں، تاہم طلبہ کی تخلیقی، ذہنی اور عملی نشوونما میں اس کی اہمیت سے انکار نہیں کیا جا سکتا۔
سربراہ شعبہ آرکیٹیکچر و سول ٹیکنالوجی مدیحہ یونس نے کہا کہ ادارہ اپنے طلبہ کو عالمی معیار کی تعلیم کے ساتھ عملی مہارتیں بھی فراہم کر رہا ہے تاکہ وہ بین الاقوامی سطح پر نمایاں مقام حاصل کر سکیں۔ طلبہ نے بھی نمائش کو اپنی صلاحیتوں کے اظہار اور اعتماد میں اضافے کا بہترین موقع قرار دیا۔
تقریب کے اختتام پر آرکیٹیکچر ڈیپارٹمنٹ کی سوشل میڈیا ٹیم کو ان کی شاندار کارکردگی پر خصوصی شیلڈ بھی پیش کی گئی، جس سے یہ یادگار تقریب مزید خاص بن گئی۔
