لاہور: اینٹی نارکوٹکس فورس (اے این ایف) نے لاہور میں نوجوانوں کو نشانہ بنانے والے منشیات فروش گروہ کے خلاف بڑی کارروائی کرتے ہوئے ایک منظم نیٹ ورک کو بے نقاب کردیا۔
ترجمان اے این ایف کے مطابق یہ نیٹ ورک ایک خاتون اور اُس کی بیٹیوں کی سرکردگی میں چلایا جارہا تھا جو لاہور کے ڈیفنس اور دیگر پوش علاقوں میں کوکین، ایکسٹسی، ویڈ اور میتھ ایمفیٹامائن (آئس) کی فراہمی میں ملوث تھا۔
مصدقہ انٹیلی جنس اطلاعات پر اے این ایف نے لاہور کے مختلف علاقوں میں تین مربوط چھاپے مارے۔ کارروائی کے دوران خاتون اور اُس کا ڈرائیور ڈی ایچ اے سے گرفتار کیا گیا جن کے قبضے سے کوکین، آئس اور ویڈ برآمد ہوئی۔
بعد ازاں ڈی ایچ اے اور ایچ بی ایف سی ہاؤسنگ سوسائٹی میں واقع ملزمان کے گھروں کی تلاشی کے دوران مزید بڑی مقدار میں منشیات برآمد ہوئیں جن میں 5 کلوگرام آئس، 120 گرام کوکین، 232 ایکسٹسی گولیاں، 280 گرام ویڈ اور 70 بوتل شراب شامل ہیں۔
ترجمان کے مطابق چھاپوں کے دوران ملزمہ کی بیٹیاں فرار ہونے میں کامیاب ہوگئیں، تاہم اے این ایف نے ان کی گرفتاری اور پورے نیٹ ورک کو ختم کرنے کے لیے فالو اپ کارروائیاں شروع کردی ہیں۔
