لودھراں – عوام ایکسپریس کی چار بوگیاں اتوار کی علی الصبح لودھراں ریلوے اسٹیشن کے قریب پٹڑی سے اتر گئیں، جس کے نتیجے میں ایک شخص جاں بحق اور کم از کم 24 مسافر زخمی ہوگئے۔
لودھراں کی ڈپٹی کمشنر ڈاکٹر لبنیٰ نذیر کے مطابق زخمیوں میں چار خواتین، تین بچے اور 16 مرد شامل ہیں۔ 17 مسافروں کو ابتدائی طبی امداد فراہم کرنے کے بعد فارغ کردیا گیا، جبکہ تین افراد ڈسٹرکٹ ہیڈکوارٹر اسپتال میں زیر علاج ہیں اور ان کی حالت خطرے سے باہر ہے۔
ابتدائی طور پر 19 افراد کے زخمی ہونے کی اطلاع دی گئی تھی تاہم بعد ازاں مزید مسافروں کو ڈبوں سے نکالنے کے بعد تعداد میں اضافہ ہوا۔ زخمیوں کو بہاول وکٹوریہ اسپتال منتقل کیا گیا جہاں ایک مسافر جان کی بازی ہار گیا۔
ریسکیو ٹیموں نے فوری طور پر آپریشن مکمل کرتے ہوئے مسافروں کو تباہ شدہ ڈبوں سے نکالا۔ ڈاکٹر نذیر نے کہا کہ حادثے کی اصل وجہ تاحال معلوم نہیں ہوسکی۔
وفاقی وزیر ریلوے خواجہ محمد حنیف عباسی نے قیمتی جان کے ضیاع پر گہرے دکھ کا اظہار کیا اور واقعے کی تحقیقات کا حکم دیتے ہوئے سات دن میں رپورٹ طلب کرلی۔ انہوں نے زخمی مسافروں کو مکمل طبی سہولیات فراہم کرنے کی بھی ہدایت کی۔
وزیر ریلوے نے کہا کہ اپ ٹریک پر ٹرین سروس بحال کردی گئی ہے جبکہ ڈاؤن ٹریک کی کلیئرنس کے لیے کام جاری ہے۔ حادثے کے وقت عوام ایکسپریس پشاور سے کراچی جارہی تھی۔
یہ واقعہ گزشتہ چند ماہ میں ہونے والے ریلوے حادثات کے تسلسل کا حصہ ہے۔ گزشتہ ماہ شکارپور کے قریب ٹریک پر دھماکے سے جعفر ایکسپریس کی تین بوگیاں پٹڑی سے اتر گئیں تھیں، جس میں ایک مسافر زخمی ہوا تھا۔ جون میں جیکب آباد کے قریب اسی ٹرین کی پانچ بوگیاں دھماکے کے باعث اتر گئی تھیں تاہم کوئی جانی نقصان نہیں ہوا تھا۔
