شارجہ سے جعلی برطانوی ویزوں پر 5 پاکستانی ڈی پورٹ

شارجہ حکام نے جعلی برطانوی ویزوں کے ذریعے سفر کی کوشش کرنے والے 5 پاکستانی شہریوں کو ڈی پورٹ کر دیا۔ ترجمان ایف آئی اے کے مطابق ڈی پورٹ کیے گئے مسافروں کو لاہور ایئرپورٹ پہنچتے ہی حراست میں لے لیا گیا۔

ایف آئی اے کا کہنا ہے کہ یہ افراد رواں سال وزٹ ویزے پر لاہور سے ملائیشیا گئے تھے، جس کے بعد انہوں نے شارجہ کے راستے جعلی دستاویزات پر برطانیہ جانے کی کوشش کی۔

ترجمان کے مطابق ملزمان نے مقامی ایجنٹوں کے ذریعے جعلی ویزے حاصل کیے تھے، جس کی تصدیق ہونے پر شارجہ حکام نے انہیں پاکستان واپس بھیج دیا۔

ایف آئی اے نے بتایا کہ تمام ملزمان کو گرفتار کرکے انسدادِ انسانی اسمگلنگ سرکل لاہور منتقل کردیا گیا ہے، جہاں ان سے مزید تفتیش جاری ہے۔