کراچی: لیاری کے علاقے پرانا حاجی کیمپ میں ہوٹل مالک کی فائرنگ سے ایک نوجوان جاں بحق ہوگیا۔ پولیس کے مطابق واقعہ غلط فہمی کے باعث پیش آیا۔
تفصیلات کے مطابق کلاکوٹ کے علاقے پرانا حاجی کیمپ گلی نمبر ایک میں واقع الحفیظ میزان ریسٹورنٹ المعروف بھٹو ہوٹل میں منگل اور بدھ کی درمیانی شب فائرنگ کا واقعہ پیش آیا۔ ہوٹل کے مالک ثناء اللہ ولد عزیزاللہ نے فائرنگ اس وقت کی جب دو افراد اچانک ہوٹل میں داخل ہوئے، جس پر مالک کو شبہ ہوا کہ وہ ڈاکو یا ٹارگٹ کلرز ہیں۔
فائرنگ کے نتیجے میں 24 سالہ مصطفیٰ کچھی ولد سکندر کچھی کے سر میں گولی لگی، جسے شدید زخمی حالت میں سول اسپتال منتقل کیا گیا، تاہم وہ دوران علاج دم توڑ گیا۔ پولیس کے مطابق مقتول کے پاس سے کے الیکٹرک کا شناختی کارڈ برآمد ہوا۔
پولیس نے موقع پر پہنچ کر ہوٹل مالک کو حراست میں لے لیا اور اسلحہ قبضے میں لے کر تھانہ کلاکوٹ کے حوالے کردیا۔ پولیس کا کہنا ہے کہ واقعہ غلط فہمی کا نتیجہ تھا، تاہم تحقیقات جاری ہیں۔
پولیس کے مطابق واقعے کے دو مقدمات درج کر لیے گئے ہیں — ایک مقدمہ مقتول کے والد کی مدعیت میں فائرنگ اور قتل کے الزام میں، جبکہ دوسرا غیر قانونی اسلحہ رکھنے پر سرکاری مدعیت میں درج کیا گیا ہے۔
ابتدائی تحقیقات کے مطابق مقتول نوجوان پولیس کے ساتھ علاقے میں غیر قانونی طور پر مقیم غیر ملکیوں کی تلاش میں شریک تھا، جب یہ افسوسناک واقعہ پیش آیا۔
