ہالی ووڈ اداکارہ امانڈا سیفریڈ نے “Mamma Mia! 3” کے حوالے سے اہم اپڈیٹ دیتے ہوئے کہا ہے کہ انہیں پورا یقین ہے کہ یہ فلم ضرور بنے گی، اگرچہ ابھی تک اس کا باضابطہ اعلان نہیں ہوا۔ اداکارہ نے حالیہ گفتگو میں کہا کہ انہیں “احساس ہے کہ یہ فلم بن کر رہے گی۔”
رپورٹس کے مطابق یہ فلم 2026 کے آغاز سے ترقی کے مراحل میں ہے جبکہ پروڈیوسر کے مطابق اس کا اسکرپٹ مئی 2025 میں مکمل ہو چکا تھا۔
اس کے باوجود فلم کو ابھی تک گرین لائٹ نہیں ملی اور کاسٹ یا شوٹنگ کے شیڈول کے بارے میں حتمی معلومات سامنے نہیں آئی ہیں۔ امانڈا سیفریڈ پہلے بھی کہہ چکی ہیں کہ اگر انہیں اس فلم میں شامل نہ کیا گیا تو وہ ناراض ہوں گی۔
انہوں نے کہانی کے حوالے سے بھی اشارہ دیا کہ ان کا کردار “سوفی” اب ایک ماں کے طور پر یونان کے جزیرے میں زندگی گزارتی نظر آ سکتا ہے، جو اس کی والدہ “ڈونا” کی کہانی سے ملتا جلتا ہوگا۔ دوسری جانب میریل اسٹریپ نے بھی واپسی میں دلچسپی ظاہر کی ہے۔
ماہرین کے مطابق سب سے بڑا چیلنج کاسٹ کے شیڈول کو ہم آہنگ کرنا اور فلم کی کہانی اور میوزک کو حتمی شکل دینا ہے۔ اس کے باوجود شائقین اور کاسٹ کی دلچسپی اس منصوبے کو زندہ رکھے ہوئے ہے۔
یعنی اگرچہ “Mamma Mia! 3” کا ابھی باضابطہ اعلان نہیں ہوا، لیکن حالیہ بیانات سے لگتا ہے کہ یہ فلم مستقبل میں ضرور بن سکتی ہے۔
