ملتان: کسٹمز انفیورسمنٹ نے پولیس اور ضلعی انتظامیہ کے تعاون سے جمعہ کے روز ملتان کی اناج منڈی میں بڑے پیمانے پر اینٹی اسمگلنگ آپریشن کیا، جس کے دوران کروڑوں روپے مالیت کی اسمگل شدہ اشیاء برآمد کی گئیں ۔
کسٹمز حکام کے مطابق برآمد شدہ سامان میں درآمد شدہ سگریٹ، چائنیز نمک، تمباکو، چھالیہ اور ڈرائی ملک شامل ہیں۔ آپریشن کے دوران اسمگل شدہ سامان سے لدے 17 سے زائد ٹرک قبضے میں لیے گئے جبکہ متعدد گرفتاریاں بھی عمل میں آئیں۔
حکام کا کہنا ہے کہ کارروائی کے دوران اناج منڈی میں شدید مزاحمت کا سامنا بھی کرنا پڑا، تاہم آپریشن کامیابی سے مکمل کر لیا گیا۔
کلکٹر کسٹمز انفیورسمنٹ ملتان کے مطابق وزیرِاعظم کی ہدایات پر اسمگلنگ کے خلاف بڑا آپریشن شروع کیا گیا ہے اور غیر قانونی تجارت کے خاتمے کے لیے کسی قسم کی رعایت نہیں دی جائے گی۔
