اسلام آباد: وزیر اعظم شہباز شریف آج سعودی عرب کے سرکاری دورے پر روانہ ہوں گے۔ یہ دورہ سعودی ولی عہد شہزادہ محمد بن سلمان کی خصوصی دعوت پر ہو رہا ہے۔
وزیر اعظم کے ساتھ اہم وزراء بھی ہوں گے جن میں نائب وزیر اعظم و وزیر خارجہ اسحاق ڈار، وزیر دفاع خواجہ آصف، وزیر خزانہ محمد اورنگزیب اور وزیر اطلاعات عطا اللہ تارڑ شامل ہیں۔
اس ایک روزہ دورے کے دوران شہباز شریف سعودی ولی عہد سے ملاقات کریں گے جس میں پاکستان اور سعودی عرب کے دوطرفہ تعلقات کا جائزہ لیا جائے گا اور مختلف شعبوں میں تعاون کو مزید مضبوط بنانے پر بات چیت ہوگی۔
ذرائع کے مطابق ملاقات میں سرمایہ کاری، تجارت، اور دیگر باہمی دلچسپی کے امور پر تبادلہ خیال ہوگا، جبکہ علاقائی اور عالمی حالات پر بھی بات ہوگی۔
پاکستان اور سعودی عرب دیرینہ تعلقات رکھتے ہیں جو اعتماد، مذہبی رشتوں اور مشترکہ اقدار پر مبنی ہیں۔ حکومتی حلقوں کا کہنا ہے کہ یہ دورہ دونوں ممالک کے درمیان تعلقات کو مزید فروغ دینے اور نئے مواقع تلاش کرنے میں اہم کردار ادا کرے گا۔
