اسلام آباد — وزیر اعظم شہباز شریف کی زیر صدارت وفاقی کابینہ نے ای او بی آئی کے پنشنرز کے لیے پنشن میں 15 فیصد اضافے کی منظوری دے دی ہے، جو یکم جنوری 2025 سے نافذ العمل ہوگا۔
یہ اضافہ ادارے کے اپنے وسائل سے کیا جائے گا اور اس کا مقصد بڑھتی ہوئی مہنگائی کے پیش نظر پنشنرز کو ریلیف دینا ہے۔
وزیر اعظم نے ای او بی آئی میں ادارہ جاتی اصلاحات اور غیر رسمی شعبے کے مزدوروں — جیسے گھریلو ملازمین اور زرعی کارکنوں — کو سوشل سیکیورٹی میں شامل کرنے کے لیے کابینہ کمیٹی تشکیل دینے کی ہدایت بھی دی۔
کابینہ نے کینسر، دل کی بیماریوں اور دیگر جان بچانے والی ادویات کی درآمد پر پانچ سالہ ٹیکس استثنیٰ کی بھی منظوری دے دی۔ یہ ادویات صرف اسپتالوں اور لائسنس یافتہ اداروں میں دستیاب ہوں گی اور کھلی مارکیٹ میں فروخت پر مکمل پابندی ہوگی۔
مزید برآں، کابینہ نے "سی کارج شپنگ ڈاکیومنٹس بل 2025” پر ابتدائی قانونی کارروائی کی منظوری دی اور کابینہ کمیٹی برائے قانون سازی کے سابقہ فیصلوں کی توثیق کی۔
اجلاس کے دوران وزیر اعظم نے محرم الحرام میں امن و امان قائم رکھنے پر تمام حکومتی اداروں اور قانون نافذ کرنے والے اہلکاروں کی کاوشوں کو سراہا۔ انہوں نے حالیہ بارشوں سے متاثرہ علاقوں، خاص طور پر سوات میں جانی نقصان پر افسوس کا اظہار کیا اور آئندہ کے لیے بہتر تیاریوں کی ہدایت کی۔
معاشی صورتحال پر بات کرتے ہوئے وزیر اعظم نے معاشی اشاریوں میں بہتری پر اطمینان کا اظہار کیا اور وزارتوں کی کارکردگی کا ہر دو ماہ بعد جائزہ لینے کا اعلان کیا۔
