چیئرمین پیپلزپارٹی بلاول بھٹو زرداری نے وفاقی حکومت پر تنقید کرتے ہوئے کہا ہے کہ سیلاب سے سب سے زیادہ زرعی شعبہ متاثر ہوا، مگر وفاقی حکومت بی آئی ایس پی کے ذریعے متاثرین کی بروقت مدد کرنے کے بجائے انا کی سیاست کر رہی ہے۔
کراچی میں پریس کانفرنس سے خطاب کرتے ہوئے بلاول بھٹو نے کہا کہ مسلم لیگ (ن) نے انتخابات کے دنوں میں بی آئی ایس پی کی تعریفیں کی تھیں، لیکن اب معلوم نہیں کیوں اپنی پوزیشن بدل لی ہے۔
ان کا کہنا تھا کہ وفاقی حکومت کو عالمی برادری سے فوری طور پر امداد کی اپیل کرنی چاہیے تھی، اگر وقت پر قدم اٹھایا جاتا تو ہزاروں مزید متاثرہ خاندانوں کو سہارا دیا جا سکتا تھا۔ انہوں نے کہا کہ عالمی امداد حاصل کرنا پنجاب حکومت کا نہیں بلکہ وفاق کا فرض ہے۔
بلاول بھٹو زرداری نے مزید کہا کہ اب تک مسلم لیگ (ن) نے کسی آئینی ترمیم کا مسودہ پیپلزپارٹی کے ساتھ شیئر نہیں کیا۔ اگر وہ واقعی کوئی ترمیم چاہتے ہیں تو مشاورت کے دروازے کھلے ہیں اور فیصلہ بات چیت سے ہونا چاہیے۔
