یورپی ملک سلووینیا نے اسرائیلی وزیراعظم بنیامین نیتن یاہو پر سفری پابندی عائد کر دی ہے۔ یہ فیصلہ غزہ میں جاری جنگ اور انسانی حقوق کی مبینہ سنگین خلاف ورزیوں کے پس منظر میں کیا گیا ہے۔
حکومتی بیان کے مطابق یہ پابندی صرف نیتن یاہو تک محدود نہیں بلکہ ان تمام اسرائیلی رہنماؤں پر بھی عائد کی جائے گی جو فلسطینی عوام کے خلاف کارروائیوں کے ذمہ دار سمجھے جاتے ہیں۔
خیال رہے کہ سلووینیا نے گزشتہ برس فلسطینی ریاست کو باضابطہ طور پر تسلیم کیا تھا، جبکہ اس سال اگست میں اسرائیل پر ہتھیاروں کی برآمدات اور مقبوضہ فلسطینی علاقوں کی مصنوعات کی درآمد پر بھی پابندی لگا دی تھی۔
یورپ میں اسرائیلی پالیسیوں پر بڑھتی ہوئی تنقید کے تناظر میں یہ فیصلہ اس بات کا اشارہ ہے کہ خطے کی صورتحال پر یورپی حکومتوں کے مؤقف میں سختی آ رہی ہے۔
