پنجاب حکومت نے اعلان کیا ہے کہ صوبے کے پسماندہ علاقوں میں “نواز شریف اسکولز آف ایمنینس” کے نام سے تعلیمی ادارے قائم کیے جائیں گے تاکہ غریب اور مستحق طلبہ کو معیاری تعلیم فراہم کی جا سکے۔
اس منصوبے کے لیے صوبے کے 165 تحصیلوں کا انتخاب کیا گیا ہے۔ جدید سہولتوں والے نجی تعلیمی اداروں کو دعوت دی گئی ہے کہ وہ ان اسکولوں کی میزبانی کے لیے درخواست دیں۔ درخواستیں جمع کروانے کی آخری تاریخ 14 نومبر مقرر کی گئی ہے۔
ان اسکولوں میں پڑھنے والے طلبہ کو مفت تعلیم دی جائے گی، جبکہ حکومت فی طالبعلم 4,000 روپے ماہانہ بطور فیس ادا کرے گی۔
پنجاب ایجوکیشن فاؤنڈیشن (PEF) ان اسکولوں کی نگرانی اور معیارِ تعلیم کو یقینی بنانے کی ذمہ دار ہوگی۔
حکام کے مطابق، اس منصوبے کا مقصد صوبے کے کم ترقی یافتہ علاقوں میں تعلیم کے مواقع بڑھانا اور تعلیمی معیار بہتر بنانا ہے۔
