ڈیرہ اسماعیل خان، 23 جنوری: ڈیرہ اسماعیل خان کے علاقے قریشی موڑ کے قریب شادی کی ایک تقریب کے دوران ہونے والے خودکش دھماکے میں کم از کم 6 افراد جاں بحق جبکہ 7 افراد زخمی ہو گئے۔ پولیس اور ریسکیو ذرائع کے مطابق واقعہ جمعہ کی شب پیش آیا۔
پولیس کا کہنا ہے کہ خودکش حملہ آور نے جنوبی وزیرستان ٹھیکیدار یونین کے صدر نور حسن محسود کی رہائش گاہ پر ہونے والی شادی کی تقریب کے دوران ایک کمرے کے اندر خود کو دھماکے سے اڑا لیا، جس کے نتیجے میں عمارت کی چھت منہدم ہو گئی اور متعدد افراد ملبے تلے دب گئے۔
ریسکیو 1122 کے مطابق اطلاع ملتے ہی ایمبولینسز اور ڈیزاسٹر رسپانس ٹیمیں جائے وقوعہ پر پہنچ گئیں۔ جاں بحق اور زخمی افراد کو فوری طور پر ڈی ایچ کیو ہسپتال منتقل کیا گیا، جہاں بعض زخمیوں کی حالت تشویشناک بتائی جا رہی ہے۔
ڈسٹرکٹ پولیس آفیسر ڈیرہ اسماعیل خان سجاد احمد صاحبزادہ نے تصدیق کی ہے کہ جائے وقوعہ سے خودکش حملہ آور کا سر برآمد ہوا ہے، جس سے ثابت ہوتا ہے کہ یہ ایک خودکش حملہ تھا۔
پولیس کے مطابق جاں بحق افراد میں وحید اللہ محسود عرف جگری محسود، ایڈووکیٹ عبدالمجید لاگری، رحمان اللہ ٹھیکیدار، شہزاد، عنایت اللہ اور چھوٹا وحید شامل ہیں۔
زخمیوں میں وارث خان، نور عالم محسود، توحید اللہ، رحمان خان، سہیل خان برکی اور نذیر اللہ شامل ہیں۔
واقعے کے بعد سیکیورٹی فورسز نے علاقے کو گھیرے میں لے کر شواہد اکٹھے کرنا شروع کر دیے ہیں جبکہ واقعے کی مختلف پہلوؤں سے تحقیقات جاری ہیں۔
