کراچی کے مختلف علاقوں میں پیش آنے والے دو الگ الگ واقعات میں اندھی گولی لگنے سے دو نوجوان زخمی ہو گئے۔
پہلا واقعہ کورنگی کوسٹ گارڈ چورنگی کے قریب تھانہ زمان ٹاؤن کی حدود میں پیش آیا، جہاں ایک شادی ہال کے سامنے اندھی گولی لگنے سے ایک شخص زخمی ہو گیا۔ زخمی کو جناح اسپتال منتقل کیا گیا، جہاں اس کی شناخت 30 سالہ عامر ولد عمر کے نام سے ہوئی۔
پولیس کے مطابق شادی کی تقریب کے دوران مبینہ طور پر ہوائی فائرنگ کی جا رہی تھی، جس کے دوران گولی لگنے سے یہ واقعہ پیش آیا۔ واقعے کی مزید تفتیش جاری ہے۔
دوسرا واقعہ سولجر بازار نمبر ایک میں پیش آیا، جہاں نامعلوم سمت سے آنے والی گولی لگنے سے ایک اور نوجوان زخمی ہو گیا۔ زخمی کی شناخت 25 سالہ ظفیر اللہ ولد محمد نعیم کے نام سے کی گئی، جسے فوری طور پر سول اسپتال منتقل کر دیا گیا۔
ترجمان کراچی پولیس کے مطابق ابتدائی معلومات میں دونوں واقعات اندھی گولی لگنے کے شاخسانے معلوم ہوتے ہیں، تاہم مزید تفتیش کا عمل جاری ہے۔
