پاکستان اسٹیل مل کی موجودہ جگہ پر جدید ترین اسٹیل فیکٹری تعمیر کی جائے گی
اسلام آباد: پاکستان میں صنعتی ترقی اور غیر ملکی سرمایہ کاری کو فروغ دینے کے لیے پاکستان اور روس نے کراچی میں ایک جدید ترین اسٹیل مل قائم کرنے پر اتفاق کیا ہے۔
یہ فیصلہ وزیرِاعظم کے معاونِ خصوصی ہارون اختر اور روسی حکومت کے نمائندے ڈینس نزاروف کے درمیان اعلیٰ سطحی ملاقات کے دوران سامنے آیا۔
روزنامہ دی نیوز کے مطابق، دونوں ممالک نے اس منصوبے کو آگے بڑھانے کے لیے ایک مشترکہ ورکنگ گروپ تشکیل دینے پر اتفاق کیا ہے۔ یہ گروپ منصوبے کی ترقی، تکنیکی منصوبہ بندی اور سرمایہ کاری کے ڈھانچے کی نگرانی کرے گا۔
پاکستان کا ارادہ ہے کہ نئی اسٹیل فیکٹری پاکستان اسٹیل مل (PSM) کی موجودہ جگہ پر تعمیر کی جائے۔ اگر معاہدہ حتمی شکل اختیار کر لیتا ہے، تو نئی مل 19,000 ایکڑ پر مشتمل PSM کے رقبے میں سے 700 ایکڑ پر قائم کی جائے گی، جس کے لیے حکومت نے زمین مختص کر دی ہے، ایک سرکاری اہلکار نے تصدیق کی۔
یہ نئی اسٹیل مل پاکستان اور روس کے درمیان اقتصادی تعاون کے ایک اہم سنگِ میل کے طور پر دیکھی جا رہی ہے۔
