کراچی کے شہریوں کے لیے خوشخبری ہے کہ سول اسپتال کے بے نظیر بھٹو ٹراما سینٹر میں تھیوراسک سرجری وارڈ اور جدید آپریشن تھیٹر کا افتتاح کردیا گیا ہے۔ 30 بستروں پر مشتمل اس وارڈ میں سینے، دل اور پھیپھڑوں کے پیچیدہ آپریشن کیے جا سکیں گے، جبکہ بچوں کے لیے بھی خصوصی تھیوراسک سرجری سروسز فراہم کی جائیں گی۔
اسپتال انتظامیہ کے مطابق، اب ٹی بی، پھیپھڑوں میں پیپ، کینسر، ٹیومرز اور حادثات کے باعث پھیپھڑوں کو پہنچنے والے نقصان کا علاج سرکاری سطح پر ممکن ہوگا اور مریضوں کو نجی اسپتالوں کا رخ نہیں کرنا پڑے گا۔
اس کے ساتھ ساتھ اسپتال میں ویڈیو اسسٹڈ تھیوراکوسکوپک سرجری کی سہولت بھی متعارف کرائی گئی ہے، جو جدید اور کم تکلیف دہ طریقہ علاج ہے۔
قومی ادارہ صحت برائے امراض اطفال کے ماہر ڈاکٹر جمشید اختر کا کہنا ہے کہ بعض اوقات بچوں کے سینے میں ہوا بھر جاتی ہے، جسے نیموتھیوراسک کہا جاتا ہے۔ اگرچہ بچوں میں صحتیابی کے امکانات زیادہ ہوتے ہیں، تاہم پیچیدگی کی صورت میں یہ خطرناک بھی ثابت ہو سکتا ہے۔
