کراچی: پاکستان موسمیاتی محکمہ (پی ایم ڈی) کے مطابق بدھ کی صبح کراچی کے مختلف علاقوں میں ہلکے درجے کے زلزلے کے جھٹکے محسوس کیے گئے، جن کی شدت ریکٹر اسکیل پر 3.2 ریکارڈ کی گئی۔
محکمہ موسمیات کا کہنا ہے کہ زلزلہ صبح 9 بج کر 34 منٹ پر آیا، جس کا مرکز ملیر کے شمال مغرب میں 7 کلومیٹر دور اور زمین میں 10 کلومیٹر گہرائی میں تھا۔
ابتدائی اطلاعات کے مطابق زلزلے سے کسی جانی یا مالی نقصان کی اطلاع موصول نہیں ہوئی۔ شہریوں نے مختلف علاقوں خصوصاً ملیر، کورنگی اور اطراف میں ہلکی لرزش محسوس کی۔
ماہرین کا کہنا ہے کہ حالیہ مہینوں میں کراچی اور مضافاتی علاقوں میں کئی بار چھوٹے درجے کے زلزلے ریکارڈ کیے جا چکے ہیں۔ ان زلزلوں کی شدت کم ہونے کے باعث نقصان تو نہیں ہوتا، تاہم یہ اس بات کی علامت ہیں کہ خطے میں موجود فالٹ لائن پر دباؤ بتدریج خارج ہو رہا ہے۔
محکمہ موسمیات کے ماہرین کے مطابق یہ چھوٹے جھٹکے بڑے زلزلے کی پیشگی نشانی نہیں سمجھے جاتے، لیکن ان سے ظاہر ہوتا ہے کہ خطے میں ارضیاتی سرگرمیاں موجود ہیں اور اس پر مسلسل نظر رکھنے کی ضرورت ہے۔
