کراچی: پاپوش نگر تھانے میں زیرِ حراست ملزم عباس مبینہ طور پر پولیس اہلکاروں کے تشدد اور فائرنگ سے جاں بحق ہوگیا، جس کے بعد پولیس کے رویے پر سنگین سوالات اٹھ گئے ہیں۔
تفصیلات کے مطابق عدالتی احکامات پر ایف آئی اے اینٹی کرپشن سرکل نے واقعے میں ملوث دو پولیس اہلکاروں، سب انسپکٹر خادم حسین اور کانسٹیبل اظہارالحق، کے خلاف مقدمہ درج کرلیا ہے۔
پولیس نے ابتدائی طور پر ملزم کو لاک اپ سے فرار ظاہر کرکے اسے پولیس مقابلے میں ہلاک قرار دیا تھا، تاہم متوفی کی لاش پر تشدد کے نشانات پائے گئے۔
پاپوش نگر پولیس نے 30 جولائی کو اس واقعے کا مقدمہ پولیس مقابلہ ظاہر کرتے ہوئے درج کیا تھا، لیکن جوڈیشل مجسٹریٹ سینٹرل کے حکم پر ایف آئی اے اینٹی کرپشن سرکل کو عدالتی تحقیقات کی ہدایت دی گئی۔ بعد ازاں ڈی آئی جی ویسٹ زون نے مقدمہ اندراج اور تفتیش کے لیے ایف آئی اے کو مراسلہ ارسال کیا۔
پولیس کے مؤقف کے مطابق، ملزم لاک اپ سے باہر آنے کے بعد فرار ہونے کی کوشش کر رہا تھا اور دورانِ مزاحمت پستول چھیننے کی کوشش میں گولی چلنے سے ہلاک ہوگیا۔ تاہم، معاملے کی تحقیقات جاری ہیں تاکہ حقائق سامنے آسکیں۔
