راولپنڈی: اینٹی نارکوٹکس فورس (اے این ایف) نے پشاور اور چاغی میں مؤثر کارروائیاں کرتے ہوئے کروڑوں روپے مالیت کی منشیات برآمد کرلی ہیں۔ کارروائیاں ملک بھر میں منشیات اسمگلنگ کے خلاف جاری کریک ڈاؤن کا حصہ ہیں۔
ترجمان اے این ایف کے مطابق، فورس نے تعلیمی اداروں کے اطراف اور مختلف شہروں میں منشیات فروشوں کے خلاف کارروائیاں کیں۔ تین مختلف کارروائیوں کے دوران دو ملزمان کو گرفتار کر کے 2 کروڑ 95 لاکھ روپے سے زائد مالیت کی 209.83 کلوگرام منشیات برآمد کی گئی۔
پشاور رنگ روڈ پر یونیورسٹی کے قریب ایک کارروائی کے دوران ایک ملزم کے قبضے سے 230 گرام وزنی 350 ایکسٹیسی گولیاں برآمد ہوئیں۔ گرفتار شخص نے اعتراف کیا کہ وہ تعلیمی اداروں کے طلبہ کو منشیات فروخت کرتا تھا۔
ایک اور کارروائی میں حضرو ٹول پلازہ اٹک کے قریب موٹر سائیکل سوار ملزم سے 9.6 کلوگرام چرس برآمد ہوئی، جبکہ نوکنڈی ضلع چاغی میں کی گئی بڑی کارروائی کے دوران 200 کلوگرام افیون ضبط کی گئی۔
ترجمان کے مطابق، تمام کارروائیوں کے بعد ملزمان کے خلاف انسدادِ منشیات ایکٹ 1997 کے تحت مقدمات درج کر کے مزید تحقیقات شروع کر دی گئی ہیں تاکہ منشیات فروش نیٹ ورک کے دیگر افراد کو بھی گرفتار کیا جا سکے۔
