منشیات اسمگلنگ میں ملوث عناصر کی سفاکیت اس حد تک پہنچ چکی ہے کہ اب اپنے مکروہ دھندے کے لیے کم عمر بچوں کو استعمال کیا جانے لگا ہے۔
تفصیلات کے مطابق مردان میں دو کم عمر لڑکوں کے ذریعے آئس راولپنڈی اسمگل کرنے کی کوشش ناکام بنادی گئی۔ سیکورٹی اہلکاروں نے کارروائی کے دوران بچوں کے پیروں سے بندھے 2 ہزار گرام آئس برآمد کرلی۔
یہ کارروائی خفیہ اطلاع پر مردان–نوشہرہ روڈ پر کی گئی، جس کی نگرانی پراوینشل انچارج بیورو آف انٹیلیجنس اینڈ انویسٹیگیشن سعود خان گنڈا پور نے کی۔ آپریشن میں انسپکٹر فخر عالم خان اور سب انسپکٹر شیر شاہ سوری نے حصہ لیا۔
برآمدگی کے بعد تھانہ ایکسائز مردان میں مقدمہ درج کرلیا گیا ہے جبکہ سہولت کاروں اور مکمل نیٹ ورک کی گرفتاری کے لیے تحقیقات جاری ہیں۔ حکام کے مطابق کم عمر بچوں کا استعمال منشیات فروشوں کے بڑھتے ہوئے بے رحم طریقۂ کار کی واضح مثال ہے۔
