لاہور، 28 اگست 2025 — لاہور پولیس کے مطابق بدھ کے روز رائیونڈ میں مبینہ پولیس مقابلے کے دوران اویس اور شہزاد نامی دو ملزمان ہلاک ہوگئے۔ یہ دونوں چند روز قبل صرف 30 روپے کے جھگڑے پر دو پھل فروش بھائیوں کو بہیمانہ تشدد کا نشانہ بنانے کے الزام میں گرفتار کیے گئے تھے۔
پولیس حکام نے بتایا کہ کرائم کنٹرول ڈیپارٹمنٹ (CCD) کی ٹیم ملزمان کو مزید شناخت کے لیے علاقے میں لے کر گئی تھی کہ اس دوران توقیر نامی شخص کی قیادت میں مسلح افراد نے پولیس پارٹی پر فائرنگ کر دی اور ملزمان کو چھڑانے کی کوشش کی۔
ترجمان پولیس کے مطابق جوابی فائرنگ کے دوران اویس اور شہزاد موقع پر ہی ہلاک ہوگئے، جبکہ توقیر اور اس کے ساتھی فرار ہونے میں کامیاب ہوگئے۔ فرار ملزمان کی گرفتاری کے لیے سرچ آپریشن شروع کر دیا گیا ہے۔
یاد رہے کہ اویس اور شہزاد پر الزام تھا کہ انہوں نے 30 روپے کے تنازع پر پھل فروش بھائی وجید اور راشد کو بدترین تشدد کا نشانہ بنایا تھا۔ واقعے میں ایک بھائی موقع پر جاں بحق ہوگیا تھا جبکہ دوسرا شدید زخمی ہو کر کوما میں جانے کے بعد دم توڑ گیا۔ واقعے کی ویڈیو سوشل میڈیا پر وائرل ہوئی تھی جس کے بعد ملک بھر میں غم و غصے کی لہر دوڑ گئی تھی۔
پولیس کے مطابق شہزاد کو جدید ٹیکنالوجی کی مدد سے گرفتار کیا گیا جبکہ اویس پہلے ہی حراست میں تھا۔ حکام کا کہنا ہے کہ فرار ملزمان کو بھی جلد گرفتار کر کے عدالت میں پیش کیا جائے گا
