راولپنڈی: راولپنڈی کے علاقے رتہ امرال میں پولیس کے ساتھ فائرنگ کے تبادلے کے دوران بچوں اور بچیوں سے زیادتی کے متعدد مقدمات میں مطلوب ایک خطرناک ملزم ہلاک ہوگیا۔
پولیس کے مطابق مخبری پر چھاپہ مارا گیا تو ملزمان نے فائرنگ شروع کر دی، جس کے جواب میں پولیس نے بھی فائرنگ کی۔ اس دوران ایک حملہ آور زخمی ہوا، جسے اسپتال منتقل کیا گیا جہاں وہ دم توڑ گیا۔ ہلاک ملزم کی شناخت محمد عباس کے نام سے ہوئی، اور اس کے قبضے سے اسلحہ بھی برآمد ہوا، جب کہ اس کے دو ساتھی موقع سے فرار ہونے میں کامیاب ہوگئے۔
پولیس حکام کا کہنا ہے کہ محمد عباس معصوم بچی کے اغوا کے مقدمے میں مطلوب تھا اور راولپنڈی و لاہور میں بچوں کے اغوا اور زیادتی کے متعدد ریکارڈ شدہ مقدمات کا بھی نامزد ملزم تھا۔ اس کے خلاف بچوں سے زیادتی کے کئی غیر رپورٹ شدہ واقعات کی اطلاعات بھی تھیں۔
فائرنگ کے دوران سب انسپکٹر محمد اویس کو گولی لگی تاہم بلٹ پروف جیکٹ نے انہیں محفوظ رکھا۔
واقعے کی اطلاع پر سینئر پولیس افسران موقع پر پہنچ گئے، جبکہ فرار ملزمان کی گرفتاری کے لیے علاقے میں سرچ آپریشن شروع کردیا گیا ہے۔
