یوکرین کے دارالحکومت کیف میں ہفتے کے روز ایک مسلح شخص کی فائرنگ کے نتیجے میں کم از کم 6 افراد ہلاک اور 14 زخمی ہوگئے۔
حکام کے مطابق حملہ آور نے شہر کے ہولوسیوسکی ضلع میں پہلے سڑک پر لوگوں پر فائرنگ کی، پھر ایک سپر مارکیٹ میں داخل ہو کر یرغمال بنا لیا۔ وزارتِ داخلہ کے مطابق ابتدائی فائرنگ میں 4 افراد موقع پر ہلاک ہوئے، جبکہ سپر مارکیٹ کے اندر ایک اور شخص جان سے گیا۔ بعد ازاں ایک زخمی شہری اسپتال میں دم توڑ گیا، جس کے بعد ہلاکتوں کی تعداد 6 ہوگئی۔
حکام نے بتایا کہ پولیس نے حملہ آور سے تقریباً 40 منٹ تک مذاکرات کیے، تاہم بات چیت ناکام ہونے پر خصوصی دستوں نے کارروائی کی۔ آپریشن کے دوران 4 یرغمالیوں کو بحفاظت رہا کرا لیا گیا، جبکہ مزاحمت کرنے پر حملہ آور کو ہلاک کر دیا گیا۔
یوکرینی صدر وولودی میر زیلنسکی نے واقعے پر افسوس کا اظہار کرتے ہوئے متاثرہ خاندانوں سے تعزیت کی ہے۔ حکام کے مطابق ملزم 58 سالہ شخص تھا اور اس کے قبضے میں موجود ہتھیار قانونی طور پر رجسٹرڈ تھا۔ واقعے کے محرکات جاننے کے لیے تحقیقات جاری ہیں۔
