لاہور کے نجی تعلیمی ادارے Keynesian Institute of Management & Sciences (KIMS) کو شدید تنقید کا سامنا ہے، جہاں طلبہ اور والدین نے الزام عائد کیا ہے کہ پنجاب حکومت کی جانب سے اعلان کردہ گرمیوں کی تعطیلات کے باوجود امتحانات کا سلسلہ جاری رکھا گیا۔
رپورٹس کے مطابق پنجاب حکومت نے شدید گرمی اور ہیٹ ویو کے پیش نظر 22 مئی سے تعلیمی اداروں میں موسم گرما کی تعطیلات کا اعلان کیا تھا۔ تاہم طلبہ کا کہنا ہے کہ KIMS میں او لیول (O1) کے امتحانات 11 جون تک جبکہ آٹھویں جماعت کے امتحانات 4 جون تک جاری رکھنے کا شیڈول دیا گیا۔
والدین اور طلبہ نے مؤقف اختیار کیا ہے کہ شدید گرمی میں امتحانات کا انعقاد بچوں کی صحت کے لیے خطرناک ثابت ہو سکتا ہے۔ ان کا کہنا ہے کہ حکومتی احکامات کا مقصد طلبہ کو ہیٹ ویو کے اثرات سے محفوظ رکھنا تھا، لیکن امتحانات جاری رکھنے سے ان ہدایات کی خلاف ورزی ہوئی ہے۔
دوسری جانب، ادارے کے تعلیمی پروگرام کے مطابق KIMS کا او لیول سسٹم مختصر گرمیوں کی تعطیلات پر مشتمل ہے، جس کے باعث اس کا تعلیمی شیڈول دیگر اداروں سے مختلف بتایا جاتا ہے۔ تاہم والدین نے محکمہ تعلیم سے معاملے کی تحقیقات اور مناسب کارروائی کا مطالبہ کیا ہے۔
