لاہور کی ہال روڈ مارکیٹ میں دکانداروں سے کروڑوں روپے کے فراڈ کا سنگین واقعہ سامنے آیا ہے، جہاں کاروباری لین دین کی آڑ میں بڑی رقم خردبرد کیے جانے کا انکشاف ہوا ہے۔
ابتدائی معلومات کے مطابق تین نامزد ملزمان نے دکانداروں سے بطور امانت حاصل کی گئی تقریباً 2 کروڑ 86 لاکھ روپے کی رقم ہتھیائی اور دو روز قبل فرار ہو گئے۔ متاثرہ دکانداروں نے اپنی رقم کاروباری مقاصد کے لیے ملزمان کے پاس جمع کروا رکھی تھی۔
رقم امانت میں لینے والے ملزمان نے مبینہ طور پر رقم خردبرد کی اور موقع سے فرار ہو گئے۔
متاثرہ دکانداروں کی درخواست پر صغیر، صدام اور فیصل کے خلاف مقدمہ درج کر لیا گیا ہے۔ ایس پی سول لائنز کے مطابق ملزمان کی گرفتاری کے لیے خصوصی ٹیمیں تشکیل دے دی گئی ہیں اور مختلف مقامات پر چھاپے مارے جا رہے ہیں۔
ایس پی سول لائنز نے ایس ایچ او تھانہ قلعہ گجر سنگھ کو فوری گرفتاری کے احکامات جاری کیے ہیں۔ ایس پی سول لائنز چوہدری اثر علی کا کہنا ہے کہ ملزمان کو جلد گرفتار کر لیا جائے گا۔
