پشاور: ایف آئی اے پشاور زون نے بڑی کارروائی کرتے ہوئے جعل سازی سے پاکستانی شہریت حاصل کرنے کی کوشش ناکام بنا دی اور افغان شہری سمیت چار ملزمان کو گرفتار کر لیا۔
ترجمان ایف آئی اے کے مطابق اینٹی کرپشن سرکل پشاور نے کارروائی کرتے ہوئے نادرا ریجنل آفس پشاور سے صدیق اللہ، سمیع اللہ، فیاض خان اور یونس خان کو حراست میں لے لیا۔
ترجمان نے بتایا کہ گرفتار افغان شہری صدیق اللہ جعلی دستاویزات کے ذریعے پاکستانی شہریت حاصل کرنے کی کوشش کر رہا تھا، جب کہ یونس خان نے خود کو اس کا والد ظاہر کر کے جعل سازی میں کردار ادا کیا۔
مزید بتایا گیا کہ ملزمان فیاض خان اور سمیع اللہ نے بطور گواہ اور تصدیق کنندگان جعلی تصدیق فراہم کر کے صدیق اللہ کی غیر قانونی شہریت کے حصول میں مدد دی۔
ایف آئی اے کے مطابق ملزمان کو حراست میں لے کر تفتیش کا آغاز کر دیا گیا ہے۔
