یومِ تکبیر کے موقع پر منعقدہ آل کراچی بین الجامعات کوئز مقابلے میں وفاقی جامعہ اردو کی ٹیم نے شاندار کامیابی حاصل کرتے ہوئے پہلی پوزیشن اپنے نام کر لی۔ یہ مقابلہ پاکستان کوئز سوسائٹی کے زیرِ اہتمام، نیشنل یوتھ اسمبلی اور وفاقی جامعہ اردو کے تعاون سے ڈاکٹر عبدالقدیر خان آڈیٹوریم میں منعقد ہوا۔
شہر کی 14 جامعات کی ٹیموں نے حصہ لیا اور تین مرحلوں پر مشتمل سخت مقابلے کے بعد جامعہ اردو کی ٹیم نے میدان مارا۔ تقریب کے اختتام پر رجسٹرار ڈاکٹر سعدیہ خلیل، ڈین فیکلٹی آف سائنس ڈاکٹر زاہد، پاکستان کوئز سوسائٹی کے چیئرمین حافظ محمد نسیم اور دیگر مہمانوں نے کامیاب طلباء میں انعامات تقسیم کیے اور ان کی علمی و ادبی صلاحیتوں کو سراہا۔
تقریب کا سب سے اہم لمحہ اس وقت آیا جب ڈاکٹر سعدیہ خلیل نے تمام شرکاء کے ساتھ مل کر پاکستان کے عظیم سائنس دان اور ایٹمی پروگرام کے بانی ڈاکٹر عبدالقدیرخان (مرحوم) کو کھڑے ہو کر خراجِ تحسین پیش کیا۔
یہ تقریب نہ صرف طلباء کی صلاحیتوں کا اعتراف ثابت ہوئی بلکہ قومی ہیروز کی قربانیوں کو یاد رکھنے اور نئی نسل میں حب الوطنی کا جذبہ بیدار کرنے کا ذریعہ بھی بنی۔
